Strategidokument 2006-2010

 

 

 

 

 

 

 

 

 

 

 

 

 

 

Endringsframlegg

Strategiplan 2006-10

 

VTI-fotball

Endringar (RAUD FARGE) til handsaming i årsmøtet 20.11.06

Generell del *

Engasjement, involvering, inkludering og klubbkjensle *

Organisasjonsutvikling *

Organisasjon *

Økonomi *

Informasjon *

Sport *

Engasjement, involvering, inkludering og klubbkjensle *

Valnemnda *

Styresamansetjing *

Utval *

Organisasjonskart VTI-fotball *

Anleggsutvikling *

Kompetanseheving/Utdanningsplan *

Trenarar: *

Leiarar: *

Dommarar: *

Spelarar: *

Utdanningskalender VTI-fotball 2006 *

Sportsleg utvikling *

Spelarutviklingsplan for ungdom i alderen 8-19 år *

Innleiing. *

Årlege aktivitetsplanar. *

Krav til VTI-fotball som klubb. *

Krav til ein som er engasjert i VTI-fotball *

Knøttar og miniputtar 8-10 år. *

Lillejenter/lillegutar 10-12 år *

Smågutar/gutar småjenter/jenter 12 - 16 år *

Junioralder *

Sluttkommentar *

Økonomi *

Vi skal gjere VTI-fotball til fyrstevalet for alle gjennom å

vere ein fotballklubb der det er rom for alle meiningar, men dei tillitsvalde styrer

framstå som ein attraktiv og veldriven klubb med gode, framtidsretta lokalitetar og anlegg, ordna økonomi, demokratisk styring og inkluderande miljø

gje alle som vil spele fotball eller ta på seg andre oppgåver i klubben eit attraktivt tilbod på det nivået dei ynskjer å yte

VTI-fotball skal

tilby born og unge eit trygt, ope, inkluderande og støttande miljø der dei kan utvikle seg etter eigne ynskje og føresetnader

leggje til rette for eit trygt, godt og inkluderande miljø også utanfor kamp og trening

tilby spelarar i regionen eit godt, utviklande og attraktivt miljø opp til og med 2. divisjon for herrar og 1. divisjon for kvinner

VTI-fotball skal

gjere stadionområdet og klubbhuset til medlemmane sin andre heim

ha velutdanna, pliktoppfyllande og involverte leiarar, trenarar og dommarar på alle nivå – og gje desse gode rammevilkår, tilrettelagde arbeidsforhold og meiningsfulle oppgåver

tilby dei som vil satse mykje på fotball det dei har trong om, samstundes med at klubben vert den naturlege møtestaden for dei som vil spele fotball for kosen eller trimmen si skuld

involvere dei unge i drifta av klubben gjennom å gje dei meiningsfulle oppgåver dei kan meistre

fylgje og rullere strategiske femårsplanar for alle viktige område ved klubbdrifta

halde fokus på vidareutvikling både sportsleg og organisatorisk

Engasjement, involvering, inkludering og klubbkjensle

Organisering

Anleggsutvikling

Kompetanseheving

Sportsleg utvikling (born, unge, vaksne – breidde og topp)

Økonomi

På kvart av desse satsingsområda skal det innan 20.01.06 utarbeidast eigne handlingsplanar. Minst ein av styremedlemmene skal vere med på dette arbeidet på kvart av områda. Styret gjer førebels vedtak/godkjenner og set i verk handlingsplanane og legg desse fram for årsmøtet til godkjenning.

VTI-fotball skal vere fyrstevalet for alle, også dei som ikkje (lenger) er aktive sportsleg. Klubben skal framstå som ein klubb der alle har ansvar for kvarandre og det er kjekt å vere. Det er mange uløyste oppgåver kring arbeidet i klubben, og til dette treng ein medarbeidarar som er engasjerte og byggjer miljø. Klubbhuset skal vere medlemmene sin andre heim. Det fordrar at det skjer noko der, nær sagt heile døgeret, og at folk kjenner seg velkomne. I tillegg må ein leggje til rette for eit større engasjement på tilskodarsida. Begge desse aspekta vil også vere med å betre klubben sin økonomi.

Engasjerte og oppriktig interesserte vaksne er gode førebilete for ungdomen. Vi må vere vårt ansvar bevisste og ta vare på dei borna, ungdomane og dei som er ferdige med sin fyrste ungdom som kjem til oss i ulike samanhangar. Klubben har plass og bruk for alle, ikkje berre dei som vil spele fotball. Nokre er betre på å steike sveler enn å sparke fotball, og det må vere lov, men dei som gjerne vil vere med å spele skal få lov til det og vere velkomne, på sitt nivå. Klubben må ha tiltak som gjer den attraktiv både for barnevernet og flyktningekontoret. Kjønn, rase, alder eller handicap spelar inga rolle. VTI-fotball er for alle. Klubben skal vere ein solid støttespelar som viser att i Voldasamfunnet.

Klubben skal leggje særleg vekt på å trekkje inn dei som lett fell utanfor eller har det vanskeleg. Ikkje nødvendigvis som spelarar dersom dei ikkje ynskjer det, men som støttespelarar på område der dei ynskjer å delta. Særleg skal ungdom som av ulike årsaker sluttar å spele fotball fylgjast opp. Dei som sluttar med bakgrunn i ei klar tidsprioritering og då gjerne satsar på annan idrett skal få lov til det, men dei som føler at dei kjem til kort sportsleg av ulike grunnar skal vi søkje å byggje eit miljø for. Dei skal tilbydast oppgåver td. som arrangørar av ulike tiltak, hjelpetrenarar for yngre lag, dommarar. Alle skal bli sett og få ansvar på eit nivå dei kan makte å bere.

Å byggje ei sterk klubbkjensle vert avgjerande for både sportsleg og økonomisk suksess. Ulike grep bør nok takast her, og tiltak som engasjerer folk utover dei "faste" grupperingane må prioriterast. Dansegallaen 2005 er eit godt døme på korleis klubben kan lyfte i lag. Det er likevel viktig å hugse at alle må ha tid til eit liv utanfor klubben, så dei som seier nei må respekterast.

Det må også søkjast å få fleire til å kome på kamparrangementa på stadion. I dag er det alt for få som møter fram, ikkje berre på A-laget sine kampar, men ikkje minst når B-laget, damene eller ungdomsfotballen trillar. Særleg urovekkjande er kanskje mangelen på interesse frå dei føresette kring gute-/jente-laga.

For å hjelpe styret i dette arbeidet, og meir til, vert det sett ned eit utval som utarbeider ein plan for ulike tiltak og ser til at desse vert gjennomførte. Utvalet for miljøskaping sitt mandat vert gjeve av styret, men hovudtrekka er skisserte i organisasjonsdelen av planen. Utvalet skal under leiing av Magnhild Eikenes Kile leggje fram for styret ein plan for korleis dette arbeidet skal drivast i 2006 og i eit treårsperspektiv innan februar 2006 og drive arbeidet etter denne planen i samarbeid med styret og dei andre utvala. Denne planen skal godkjennast av styret for 2006, og leggjast fram for årsmøtet 2006. Planen skal rullerast årleg.

Frå årsskiftet 2005/06 legg VTI-fotball om organisasjonen sin til å bestå av eitt styre med ei rad underutval som har sine klart definerte arbeidsoppgåver. På denne måten vil VTI-fotball får eit styre som har betre oversikt over det som skjer i organisasjonen samstundes med at dei som sit i styret kan få frigjort seg til å drive styrearbeid utan å tenkje så mykje på at dei har ansvaret for alle små trivialitetar som også må gjerast.

Årsmøteperioden og rekneskapsåret i laget vert frå same årsskiftet endra til å fylgje kalenderåret. Dette vert gjort for å lette rekneskapsavslutninga og å ha eit rekneskapsår som samsvarar med det ein finn i samfunnet elles. I overgangsåret vert dei siste månadene av 2005 skilde ut med ein eigen rekneskap, og styret vert sitjande litt lenger.

VTI-fotball sit på enorme ressursar og det er allereie svært mykje som fungerer godt. Mange legg ned ein kjempeinnsats, kanskje utan at alle ser det, og det vert styret si oppgåve å knyte til seg desse og byggje eit støtteapparat kring dei. VTI-fotball skal vere ein demokratisk og støttande organisasjon, også med omsyn til dei som yter ein stor, friviljug innsats. Difor skal styret innan årsmøtet 2006 ha lokalisert og definert dei arbeidsområda i klubben der klubbdrifta "står og fell" med einskildpersonar sin friviljuge innsats og byggje eit utval kring desse.

Tradisjonelt har vi skilt mellom fotballstyret og yngresstyret, trass i at fyrstnemnde formelt sett har vore overordna det andre.. Dette vert det no slutt på. Klubben har eitt styre, i samsvar med slik omverda ser på oss. Difor går ein bort frå å kalle noko anna for styre og får utval for yngres avdeling, utval for seniorlaga etc. For yngres vil endringane verte minimale, men utvala kring dei andre seniorlaga vil få meir fokus i og med at dei vil ha ei primæroppgåve, nemleg å drive fotballaga. Dette vil medføre at styret vil få betre tid til å arbeide med og fylgje opp målsetningane i den generelle delen av planen i tillegg til at dei skal meisle ut ein felles politikk og sjå til at det som må gjerast vert gjort.

Styret i VTI-fotball skal vere samansett av 7 medlemmer og 4 varamedlemmer (jfr. vedtektene). Kvar av styremedlemmane skal ha ansvaret for sine fagområde som dei har eller utviklar spisskompetanse på og dei er styret sin kontaktperson opp mot utvalet for det aktuelle området. Det vil oftast vere føremålsteneleg at denne personen er medlem av utvalet, men om så ikkje er skal denne personen alltid vere oppdatert på kva som rører seg i utvalet. Dette kan til dømes skje ved at han/ho får alle referat, saklister og all annan indre kommunikasjon i gruppa på e-post. Dersom styret meiner at det er trong for eit utval innan eit område kan det opprette eit og sameleis slå saman eller leggje ned utval det ikkje lenger ser nytteverdien av. (Nokre av utvala (merka med * i lista under) sine medlemmer skal veljast av årsmøtet og kan ikkje leggjast ned.UTGÅR) Styret skal setje saman og presentere eit framlegg til utvalsmedlemmer for årsmøtet.

Til å hjelpe styret skal det opprettast eit utval som har stab/støttefunksjon. Dette er ein merkantil støttespelar for styret og det er viktig å syte føre at det i staben er kompetanse på sentrale område som økonomi i tillegg til kompetanse ein føler er dårleg dekt opp i styret. Staben vil verte styret sin rådgjevar i økonomiske saker og her skal også dei andre utvala kunne søkje råd mot. økonomi. Primæroppgåvene for staben er føring av rekneskap, sponsorpleie, lage budsjett for VTI-fotball basert på budsjetta frå utvala og å sjå til at økonomistyringa i utvala og VTI-fotball er god.

Foreldregruppene vert å sjå på som underutval av utvalet for yngres avdeling og rapporterer til dette i tråd med slik det har vore. Utvalet for yngres avdeling kan om dei sjølve ynskjer det dele seg i eit underutval for barnefotball og eit for ungdomsfotball slik det er vanleg i andre fotballklubbar, men styret skal ha eit utval å forholde seg til. Styret skal i samråd med utvala sjå til at dei som tek på seg oppgåver i klubben får tilbod om skulering i hht. utdanningsplanen.

At ein endrar organisasjonsmodellen skal i utgangspunktet ikkje føre til at nokon får dårlegare økonomi enn før. Målet er at klubben samla sett skal ha ei god økonomistyring og at ein skal kunne sameine kreftene for å gje alle eit løft, også økonomisk. Pengane går inn og ut av ei kasse, der kvart utval har sin konto. Utvala vil soleis ha vide fullmakter innanfor sine budsjettrammer, men samstundes ei forplikting til ikkje å bruke meir enn dei har fått tildelt..

VTI-fotball er ein klubb, ikkje eit konglomerat av lag som kjempar mot kvarandre. Det er soleis naturleg at alle bidreg til fellesskapen, nett som i det sivile samfunnet elles. At politiske føringar lagde av årsmøtet eller styret kan føre til at prioriterte satsingsområde også vert prioriterte økonomisk er ein naturleg konsekvens av dette.

Alle utvala skal levere realistiske budsjett i balanse til styret for godkjenning. Fristen for å levere budsjett vert sett til 1. desember slik at staben og styret har tid til å samordne desse og leggje fram eit samla budsjett for årsmøtet til godkjenning. Det vedtekne budsjettet vert styret sin økonomiske styringsreiskap, og styret har ansvar for å iverksetje tiltak dersom inntektssida skulle vise seg å svikte i høve til budsjettet. Dei ulike utvala har tilsvarande ansvar innanfor sine fagområde. For grupper i klubben med så få aktørar at det vert kunstig å ha eit utval for desse, td. dommarane, skal dei velje ein tillitsmann som har ansvaret for å levere og disponere budsjettet saman med resten av gruppa det gjeld. Utval og andre med budsjett skal lage kvartalsrapportar til styret der det går fram korleis dei ligg an i høve budsjettet sitt og korleis dei tenkjer seg utfordringane i resten av budsjettperioden løyste. Dette for å sikre at styret til ei kvar tid har oversikt. I tilfelle det vert aktuelt å flytte midlar mellom utvala skal styre kalle inn dei aktuelle utvala til eit felles møte for å få lyssett saka frå alle vinklar før vedtak kan fattast. Sjølv om dette kan verke tungvindt og byråkratisk er slike ordningar turvande for å ha god økonomisk kontroll og styring samstundes som ein tek vare på den demokratiske dimensjonen.

Når ei gruppe/utval har fått godkjent budsjettet vil leiaren i utvalet eller hans varamann med naudsynt fullmakt kunne skrive ut rekvisisjon i hht. budsjettet. Alt som vert handla skal handlast på rekvisisjon på fastsett skjema, og rekning skal sendast kasseraren som har prokura. Utvalsleiaren eller ein vald person i hans stad har med andre ord tilvisingsmynde, men må halde seg innanfor rammene som er vedtekne. Rekningar som ikkje har dekning i budsjettet eller vedtekne tilleggsløyvingar for gjeldande område skal sendast attende til utvalet med melding om at dei må omdisponere eller finne inndekning på annan måte.

Det kviler på styret eit stort ansvar for å synleggjere klubben og arbeidet som vert gjort her. Til dette har klubben sine eigne Internettsider, men det skal utarbeidast ein informasjonsstrategi som femner vidare enn det. Aktiv bruk av ekstrene medium, og då særleg lokalpressa, må til. Det er vel knappast nokon stad i Voldasamfunnet det er meir aktivitet og så mange er engasjerte som på stadionområdet. Dette må synleggjerast. Styret skal på årsmøtet 2006 presentere ein informasjonsplan for heile klubben.

For at medlemmene og andre med interesse av det skal vite kva som til ei kvar tid rører seg i klubben er det viktig at dei kan få vite kva som er vedteke i styret og utvala. Utskrifter/samandrag frå møtebøkene bør soleis publiserast på Internettsidene, men dette krev at ein er medviten kva ein kan leggje ut og ikkje. Her skal det takast omsyn til personvern og at det ikkje alltid er så lurt å avsløre strategiske val og tiltak for ålmenta til ei kvar tid.

VTI-fotball skal vere fyrstevalet for alle. For å nå denne ambisiøse målsetjinga trengs det ein velfungerande organisasjon som også kan handtere det sportslege. Klubben har trenarkoordinator og spelarutviklar, men i tillegg skal ein ha eit utval for sportsleg utvikling. Utvalet skal i samarbeid med desse to funksjonane ta seg av heile klubben. Rammene for arbeidet ligg til ei viss grad i den sportslege handlingsplanen som er utarbeidd. Det har i 2005 vore arbeidd godt på dette feltet, og dette arbeidet må halde fram og om mogeleg utvidast. Særleg viktig vert arbeidet med å byggje bru mellom yngres avdeling og seniorfotballen, då fråfallet her framleis er stort. Som ressursklubb har VTI-fotball eit særleg ansvar for å initiere og invitere til samlingar for både spelarar, trenarar og leiarar frå andre klubbar på Søre Sunnmøre.

Dette punktet er både viktig og vidtfemjande. Likevel er det eit av dei punkta der VTI-fotball ikkje heilt har lukkast med arbeidet til no. Mange eldsjeler har sett i gong gode og vellukka tiltak, men styret må, ved hjelp av eit utval, iverksetje planmessige tiltak som kan styrkje denne sida ved klubbarbeidet. Klubbhuset vil her kunne framstå som ein hjørnestein i dette arbeidet, men det ligg mange utfordringar knytt til det. Huset er godt teneleg på mange vis, men klubben er no så stor at huset tek til å verte lite. I dette utvalet er det særleg viktig å få engasjert ungdom slik at klubben kan få etablert ordningar i samsvar med deira behov, også utanfor kamp og treningsarenaen.

Tiltak som fjernsynsoverføring av fotballkampar og fredagslunch må vidareførast, men ein bør søkje å etablere tilbod i eit trygt miljø som femner vidare enn dette. Det er mange, både unge og eldre, som ikkje har funne eit miljø dei kjenner seg heime i. Å ha ein stad å vere der ein kan vere seg sjølv har ein eigenverdi. Dei som ikkje ynskjer å vere aktive utøvarar kan likevel vere smurningen som gjer at klubben går betre. Vi treng mange som yter sin skjerv i organisasjonen for å kunne gje eit godt sportsleg tilbod til dei som vil spele fotball. For ikkje å nemne at vi treng aktive og engasjerte tilskodarar som fyller tribunane.

Denne nemnda skal veljast av årsmøtet og bør vere i funksjon mesteparten av året. Å skaffe kompetente og motiverte styre- og utvalsmedlemmer er ikkje noko ein greier med nokre telefonar ein sein januarkveld. Medlemmene i valnemnda bør kjenne til kva som rører seg i klubben og ha god oversikt over ressurspersonar i miljøet. I tillegg må dei, for å kunne gje dei som vert spurde god informasjon, ha innsikt i kva som krevst for å fylle dei ulike funksjonane på ein god måte.

Det er difor viktig at dei aktivt søkjer informasjon og at alle veit kven dei er. Dette kan td. gjerast gjennom å offentleggjere kven dei er med e-postadresser og telefonnummer på klubben sine heimesider. Medlemmene må oppmodast til å ta kontakt og komme med innspel, men dette viser seg ofte å ikkje vere nok. Nemnda bør vite om alle møte på ulike nivå i klubben og ha høve til å møte på dei etter avtale med møteleiar. Alle utvala har ei plikt til å hjelpe valnemnda ved å komme med framlegg til personar dei trur kan ha den kompetansen klubben treng til ulike oppgåver.

Ved samansetjing av valnemnd bør ein søkje å finne medlemmer med store og ulike sosiale nettverk. VTI-fotball har medlemmer frå heile Voldasamfunnet og det er difor viktig at valnemnda femner vidt og tilsaman kjenner flest mogeleg av innbyggjarane.

Styret skal søkjast samansett av fylgjande funksjonar og kvalitetar i tillegg til vilje og evne til samarbeid:

Styret i VTI-fotball skal vere eit lag som arbeider til beste for heile Voldafotballen og samstundes ser til at føringar lagde av årsmøtet i klubben vert fylgde. Styret har eit særskilt ansvar for å gje utvala arbeidsvilkår som set dei i stand til å få jobben gjord.

Dei 7 styremedlemmane får ansvar og fullmakt frå årsmøtet til å drive VTI-fotball mellom årsmøta. Skal dei makte dette på ein skikkeleg måte utan at dei må ta permisjon frå den sivile jobben sin, treng dei litt hjelp. Til dette (har (går ut)) kan dei opprette (nokre(går ut)) utval(, og styret står fritt til å etablere fleire dersom dei finn det turvande(går ut). Medan styret skal jobbe overordna og søkje å finne gode løysingar for heile klubben samla sett, skal utvala jobbe med sine spesifikke ansvarsområde. Dette tyder ikkje at utvala skal ha skylappar og berre tenkje på seg og sitt, men dei har eit særleg ansvar for å leggje fram for styret gode og tenelege løysingar på sitt eige arbeidsfelt.

For at VTI-fotball skal framstå som ein attraktiv og veldriven klubb er det viktig at klubben har eit teneleg og godt vedlikehalde anlegg. Dette er styret sitt ansvar, men til å hjelpe til med dette skal årsmøtet velje eit anleggsutval. Dette utvalet skal i tillegg til å administrere vedlikehald og orden på anlegget, sjå framover og leggje planar for vedlikehald, vidare utvikling og fornying både på kort og lang sikt. Desse planane skal leggjast fram for styret for godkjenning og evt. vidaresending til årsmøtet når det trengs.

I 2005 er det utarbeidd planar for skifting av dekke på hovudbana til kunstgras, samt opparbeiding av ei 7-arbane i forlenging av denne vestover. Hausten 2005 vart det søkt spelemidlar til dette, og gruppa har arbeidd godt.

Innan mai 2006 skal gruppa leggje fram for styret eit framlegg om korleis heile anlegget skal sjå ut i 2015. Med heile området meiner ein her heile det området som er regulert til idrettsføremål i den kommunale reguleringsplanen. Dei ulike tiltaka skal prioriterast, og saka skal leggjast fram for årsmøtet for godkjenning slik at det kan jobbast vidare med planane. I prosessen fram mot ei endeleg skisse vil det vere naturleg å dra vekslar på og ha ein dialog med kommunegartnar/ planleggjar slik at det ikkje er formelle hindringar i vegen når planane skal setjast ut i livet.

Folkemøta i samband med klubbutviklingsprosjektet peika på ein del ynskje som bør vurderast tenke inn i ein slik plan. Desse er ramsa opp, utan å vere prioriterte nedanfor.

kaldhall

ei 11-ar bane til (kunstgras, gjerne med undervarme)

utviding av klubbhuset

ballbinge

idrettspark

meir parkering

mindre "løkker" (kunstgras) med ballvegg

fotballgolf

badeland

campingplass

 

På grunnlag av utkastet frå anleggsnemnda og i samarbeid med økonominemnda skal styret leggje fram ein utviklingsplan for 2007-2010 og 2007-2015 for årsmøtet. Planen skal erstatte denne og vere eit for styret bindane arbeidsdokument.

For at VTI-fotball skal framstå som ein attraktiv og veldriven klubb er det viktig at klubben tilbyr både trenarar, leiarar, dommarar og spelarar på alle nivå utdanning. Sjølv om personlege eigenskapar og kunnskap frå andre samfunnsområde er viktig å ta med, må klubben syte føre å skulere dei som stiller tida si til rådvelde for klubben slik at dei har føresetnader for å ta det rette avgjerdene til klubben og klubbmedlemmene sitt beste.

Krava som er skisserte under for kvar av gruppene trenarar og leiarar er ikkje meint å vere krav som ein må stette for å kunne ta på seg eit slikt tillitsverv, men skal vere ei rettesnor for kva klubben bør tilby dei som er viljuge til å ta på seg ei slik oppgåve. Klubben har i 2005 gjort eit kjempeløft og fått utdanna mange trenar I, men på dei andre områda skortar det mot. formell utdanning. At klubben har mange dyktige medarbeidarar med høg realkompetanse i det dei driv med er heva over tvil, men skal vi framstå som ein seriøs fotballklubb bør vi syte føre at dei som tek på seg oppgåver får høve til å skaffe seg formell kompetanse på sitt område. Meir utdanning gjer det også lettare å tenkje strukturert og innovativt i tillegg til at ein gjerne får augene opp for andre funksjonar i klubben.

Kompetanseheving kostar, men det er verdt å merkje seg at svært mange av kursa er gratis. Det som kostar pengar er utdanning av trenarar, resten dekkjer stort sett krinsen. Dersom kostnadene til utdanning eit år vert større enn budsjettet toler, kan styret opprette prioriterte ventelister. Desse skal då leggjast inn i budsjettet for det etterfylgjande året.

I utgangspunktet skal trenarar i klubben ha minst fylgjande kvalifikasjonar:

Opp til SMG/SMJ: Minst aktivitetsleiar, helst minst ein med trenar I på kvart årssteg

SMG/SMJ: Hovudtrenar minst trenar I, hjelpetrenarar minst akt.leiar

G/J/JRM/JRD: Hovudtrenar minst trenar II, hjelpetrenarar minst trenar I

SRM/SRD: Hovudtrenar og hjelpetrenar minst trenar II

Aktivitetsleiarar: minst 25

Trenar I: minst 10

Trenar II: minst 6

På trenarsida bør det vere eit overkomeleg mål at klubben har trenarar med dei skisserte kvalifikasjonane innan sesongen 2010.

Dei som er viljuge til å ta på seg tillitsverv av ulik art i klubben treng også utdanning. Fyrst og fremst treng dei kursing i sine funksjonar, men det vil vere ein styrke om dei også har innsikt i heile klubbdrifta. I tillegg er det ei føremon om dei kjenner litt til det fotballfaglege slik at dei lettare kan forstå argumentasjonen som ligg bak krav frå trenarar mm. Her er det verdt å merkje seg at det i den generelle delen av planen heiter at det er dei tillitsvalde som styrer. Med det i bakhovudet er det sjølvsagt at dei som sit i tillitsverv også må vite litt om kva utfordringar ein står over for som trenar slik at dei kan ta velfunderte og tenelege avgjerder.

Dei som tek på seg leiaroppgåver i klubben bør difor få tilbod om skulering minst til dette nivået:

Valnemda: Fotballeiar I

Oppmenn yngres avdeling: Aktivitetsleiarkurs + fotballeiar I

Oppmenn senior: Trenar I + fotballeiar II

Leiar foreldregruppe: Aktivitetsleiar + fotballeiar II

Øvrige foreldregruppestyret: Fotballeiar I + spesialkurs etter funksjon

Leiar yngres avdeling: Aktivitetsleiar + fotballeiar II

Øvrige yngres styringsgruppe: Aktivitetsleiar + fotballeiar I

Leiar styret: Trenar I + fotballeiar II

Øvrige styret: Aktivitetsleiar + fotballeiar II + spesialkurs etter funksjon

Denne lista er ikkje uttømande i og med at organisasjonsplanen ikkje er vedteken enno.

Innan sesongen 2010 skal VTI-fotball kunne mønstre minst 20 aktive, autoriserte dommarar. Av desse skal minst 5 vere kvinner, og minst ein av kvart kjønn skal vere kvalifisert for dømming på same nivå som seniorlaget av same kjønn eller høgare. I tillegg skal klubben ha minst 5 aktive rekrutteringsdommarar (helst 3m+2k) og minst 30 aktive klubbdommarar med godkjent kurs.

Alle dommarar som skal dømme i seriesystemet skal ha kurs i regi av SFK.

På klubbnivå skal ein søkje å utdanne minst 20 klubbdommarar kvart år.

Spelarar:

I tillegg til dei ordinære treningane og kampane skal VTI-fotball sine spelarar tilbydast utdanning slik:

Opp tom. lilleklassane: Fotballskule + dugleiksmerke

SMG/SMJ: dugleiksmerke

G/J: klubbdommarkurs + dugleiksmerke

JR M/D: rekrutteringsdommarkurs + aktivitetsleiar

SR M/D: rekrutteringsdommarkurs + trenar I + fotballeiar I

For å spele kampar i gute- og jenteklassa skal spelarane ha gått klubbdommarkurs. Junior og seniorspelarane bør oppmodast om å ta rekrutteringsdommarkurset i krinsregi.

Denne kalenderen er eit førebels utkast til hjelp for styret. Styret utarbeider ein komplett kalender for oppslag i klubbhuset og på Internettsidene til klubben.

Klubben har utarbeidd planar for sportsleg aktivitet og utvikling. Desse kan gjerne delast inn i to hovudkategoriar, ein for arrangement der målsetjinga er å skape engasjement, utvikling og motivasjon på alle nivå, og ein kategori for spelar- og trenarutvikling med meir spesifikk satsing inn mot utviklinga til den enkelte spelar og/eller trenar.

Som eit bindeledd mellom desse kategoriane står den sportslege handlingsplanen, som no skal reviderast, og ein spelaruviklingsplan for barne- og ungdomsfotball frå 2004, som ein arbeider etter no.

Når det gjeld arrangementsdelen er det viktig å halde på og vidareutvikle allereie eksisterande tilbod som Julecup (senior), Volda Cup (kameratcup, 14år ++), Volda fotballskule (8-12 år), årets nyskaping Bend it cup (8-10 år) og Voldafotballens dag (ein sosial dag med merkeprøvetaking i sentrum). I tillegg vil klubben komande år arrangere innandørs-KM for seniorlag, Coca Cola Cup (kameratcup á la Volda Cup), samt ein utandørscup, rundt 1. april, mynta på aldersgruppa 14-16 år. Klubben bør søkje KM-arrangement kvart år, dette er styret si oppgåve.

Som ein del av den spesifikke utviklinga av spelarar og trenarar vert det med jamne mellomrom arrangert "Trenarforum". Vidare har klubben etablert ei eiga treningsgruppe for keeperar og klubben er sentral i krinsen si satsing på spelarutvikling og klubbutvikling. Viktig i dette arbeidet er at det no er tilsett trenarkoordinator/spelarutviklar. Her er planen for spelarutvikling sentral. Kvar vår og haust har vi spelarutviklingsgrupper. Denne hausten har vi 2 på jentesida og 2 på gutesida. 2 grupper 12 - 15 år og 2 grupper 15 - 18 år. Der får kvar enkelt spelar ti tema som dei skal arbeide med i si eiga uvikling. I tillegg er det keepertrening for jenter og gutar kvar for seg.

Eit sentralt tema er også hospiteringsfilosofi. Vi arbeider med å få struktur på hospiteringa for kvar enkelt spelar som får dette tilbodet.

Vi har også tankar om å invitere naboklubbane i Ørsta og Volda til å få med spelarar i utviklingsgrupper. Dette på tvers av klubbar og kommunegrenser. Vidare er det viktig å stimulere til dugleiksutvikling, til dømes under Voldafotballens dag med merketaking m.m. I 2005 har meir enn 180 spelarar teke ulike dugleiksmerke.

Sjå elles vedlagd sportsleg handlingsplan (vedlegg) og spelarutviklingplan for ungdom i VTI-fotball. Spelarutviklingsplanen som den ligg føre her er litt endra i høve utgåva frå 2004 for å samsvare betre med det øvrige planverket i klubben. Sportsleg handlingsplan har gått ut på dato og skal reviderast av utvalet for sportsleg utvikling og leggjast fram for styret innan mai 2006. Planen skal vere ein 3-årsplan som skal rullerast årleg og vedtakast av årsmøtet.

Innleiing.

Føremålet med SPELARUTVIKLINGSPLANEN er å utvikle barne og ungdomsfotballen i Volda T&IL. Den skal legge til rette for fornuftig og målretta opplæring i eit godt miljø for alle.

Planen skal:

skape stadig betre kvalitet i klubben si talentutvikling slik at Volda framleis kan gje eit godt aktivitetstilbod og kan utvikle spelarar til eige A-lag.

styrke lagmoralen mellom lag og grupper i fotballgruppa

syte for at fotballen har ein sentral plass blant ungdom i distriktet

skape ei felles plattform, eit felles språk som grunnlag for vidare debatt og utvikling.

Utgangspunktet for arbeidet med planen har vore at talenta ikkje utviklar seg sjølve lenger. Volda har dei seinare åra ikkje klart å utvikle spelarar til eige A-lag, og klubben har og vore lite representert i aldersfastlagde krinslag.

Volda må difor auke kvaliteten og innsatsen i talentutviklingsarbeidet for at klubben skal utvikle toppspelarar.

Mål for fotballgruppa er at Volda:

tilby born og unge eit trygt, ope, inkluderande og støttande miljø der dei kan utvikle seg etter eigne ynskje og føresetnader

leggje til rette for eit trygt, godt og inkluderande miljø også utanfor kamp og trening

tilby spelarar i regionen eit godt, utviklande og attraktivt miljø opp til og med 2. divisjon for herrar og 1. divisjon for kvinner

Ungdomsgruppa i Volda fotball, har fylgjande hovudmål:

1. Volda skal ha eit trenings og utviklingsmiljø innanfor ungdomsfotballen som gjer klubben til ein av dei største i krinsen, og syte for at alle har eit aktivitets/trenings og kamptilbod ut frå eigne føresetnader. Gutar og jenter skal ha likeverdig tilbod.

2. Utvikle gode fotballspelarar som kan heve nivået på A-laget

3. Volda skal til ei kvar tid vere representert på aldersfastlagde krinslag.

4. Volda skal til ein kvar tid vere med å kjempe om krinsmeisterskap i aldersfastlagde klasser.

5. Volda skal innan 2009, og seinare til ein kvar tid, ha minst ein spelar av kvart kjønn i aldersgruppa 15-19 år som er aktuell for aldersfastlagde landslag

6. Ha ein sunn økonomi

7. Syte for at ein har anlegg som er tilpassa aktiviteten.

8. Jobbe aktivt for å få utdanna trenarar, slik at ein innanfor alle årssteg har trenar med trenar 1 kurs eller høgare.

Undermålsetjingar for ungdomsgruppa:

Volda skal:

- ha eit organisert sportsleg tilbod til alle.

- utvikle spelarar, trenarar og leiarar med gode haldningar på bana, i klubben og lokalmiljøet.

- utvikle kompetanse på trenar og leiarsida.

- ha eit godt sosialt og positivt miljø for spelarar, trenarar og leiarar.

Foreldre er óg ein naturleg del av dette .

Miljøet skal vere prega av: trivsel-, tryggleik -sjølvkjensle/sjølvrespekt/sjølvtillit. Samarbeid - medverknad - utfordringar - personleg utvikling. Ansvar - respekt - disiplin - toleranse.

Desse måla ligg til grunn for spelarutviklingsplanen.

Årlege aktivitetsplanar.

Om spelarutviklingsplanen skal verte eit hjelpemiddel for å fremje måla våre er det naudsynt at:

- trenarar og leiarar for kvart lag utarbeider årsplan og periodeplanar med treningsinnhald, konkurransetilbod for den neste sesongen innan 15 desember. Nye trenarar har frist til 15 januar.

- trenarforum diskuterer og godkjenner planane innan 1. februar og oversender desse til styret til orientering.

Evaluering av aktivitesplanar:

Kvar haust (oktober/nov) evaluerer trenarforumet sesongen med tanke på utbetring av aktivitetsplanane.

Ansvarleg: leiar for trenarforum.

Rullering av spelarutviklingsplanen:

Dette er å sjå på som ein 5-års plan, men årleg rullering og oppfølgjing som nemnt over, vert ansvarleggjort i fotballstyret og i trenarforum.

Krav til VTI-fotball som klubb.

Volda ynskjer å utvikle gode fotballspelarar frå eigne rekkjer og for å klare det skal Volda fotball:

- gje alle eit tilbod

- gje dei beste høve til å verte betre

- ha kvalifiserte trenarar og leiarar til alle lag

- drive aktiv rekruttering av trenarar og leiarar

- ha anlegg som tilfredstiller krav til breiddefotball, talentutvikling og toppfotball.

- jobbe haldningsskapande og vere ein viktig del av oppvekstmiljøet i bygda.

- vere den leiende klubben og naturlege samlingspunktet for ambisiøse spelarar i regjeonen.

- samarbeide med fotballkrinsen og aktivt ta del i utviklinga av dei beste spelarane på Sunnmøre.

Leiar - trenar:

- hugs at du er eit forbilde for spelarane

- hugs at spelarane legg meir vekt på det du gjer enn det du seier.

- lær spelarane respekt for: medspelarar, trenarar, leiarar, motspelarar og dommarar.

- gje ros og oppmuntring, gje gode øvingsbilete - vis og fortel kva ein kan gjere.

- hugs å ivareta alle spelarane. Gje tilbakemeldingar ut frå deira nivå og hald fokus på det positive.

- hugs å halde god kontakt med føresette, informer om positive og negative episoder.

- hugs at du som trenar/leiar er ansvarleg for spelarane si framferd på bana, og på reiser til og frå kampar.

- Volda er ein MOT klubb med alt det medfører.

Spelar:

- respekter trenar og dommaravgjerder

- vis god folkeskikk på bana og på reiser med laget

- møt presis til trening og kamp.

- kom på trening for å trene, ikkje for å verte trent.

- ha respekt for lagets og eige utstyr, rydd etter deg.

- ta del i fellesoppgåver og utfør plikter med ei positiv innstilling.

- bruk av rusmiddel i samband med lagets aktivitetar er bannlyst.

- ver lojal overfor trenarar, leiarar og klubb.

Spelarar, trenarar og leiarar i Volda fotball viser ansvar, respekt og gode haldningar i alle samanhengar.

Kjenneteikn ved aldersgruppa:

- Stor aktivitetstrong

- sjølvsentrert - oppteken av seg sjølv, ballen og mål

- tek verbal instruksjon dårleg

- kort konsentrasjonstid

- ideal og forbilde står sterkt

- motorisk gullalder mot slutten av perioden

- vare for kritikk

Trenings og kamptilbod:

Barnefotball er ikkje heilårsidrett.

- Fellestrening 1 til 2 gangar pr. veke for knøttar, 2 for miniputt.

- Kamp berre på eige alderstrinn i form av turneringar (ikkje seriespel)

- Motivere til uorganisert trening, gjerne i nærmiljøet

- Motivere til allsidigheit - drive annan idrett.

Sentrale mål for treninga:

* ein må tilstrebe at borna skal føle tryggleik i høve aktivitet, medspelarar, trenarar og andre vaksne rundt laget.

* skap trivsel og glede

* innføring i sentrale reglar for omgang med andre: toleranse - respekt - disiplin

* la alle delta, med likt utgangspunkt

* topping av lag skal ikkje førekomme i barnefotballen

* etterstrebe jamnbyrdigheit i trening og kamp for å skape spenning, glede og engasjement

* legg aktiviteten på eit nivå som gjer at alle får delta

* spel SKAL føregå ut frå grunnspelet i fotball 4-4 + keeper

* alle skal ha eigen ball med til kvar trening.

Taktisk teknisk påverknad:

Basisteknikk er grunnlaget for fotballspelet. Det er difor viktig at ein driv mykje spel med få spelarar på kvart lag. Etter kvart kan ein gå over til litt isolert teknisk trening. Hugs då å vise rett teknikk, jobb med få moment og jobb med desse i mange treningar. Gjentaking vil føre til at ein på sikt opplever meistring og framgong og det er motiverande.

Sentrale ting å trene på er:

- pasning med begge bein

- mottak/demping

- føring av ball

Kjenneteikn ved aldersgruppa:

- jamn og harmonisk vekst

- lik utvikling hos gutar og jenter

- god utvikling av finmotorikken, teknisk gullalder

- kreativiteten vert utvikla

- er lett å leie og påverke

- gunstig alder for påverknad av haldningar

- viljen til å lære aukar

Trenings og kamptilbod:

- trening 2 -3 ykter pr veke

- Fellestrening og kamp kun på eige alderstrinn. (kan gjere individuelle tilpassingar for 12-åringar som treng det)

- Motivere til uorganisert trening

- Motivere til allsidigheit - drive annan idrett

- Utviklingsgruppe for dei som vil/bør trene ekstra.

Trenarar i samarbeid med trenarkoordinator vel ut spelarar til gruppa ut frå:

Dugleik, haldning og innsats. Gruppa er ikkje statisk, nye kan komme til.

Utviklingsgruppa kan drivast av trenarane for laga på desse aldersstega i samband med trenarkoordinator. Ei slik gruppe bør samlast ein gang i veka, i perioder av sesongen.

Viktig at trenarane framleis tenker grunnspelet i fotball 4-4 + keeper Legg gradvis meir vekt på individuell dugleik, men tenkjer óg relasjonar.

Alle skal ha kvar sin ball på trening.

Etter avtale mellom trenarane for avgjevande og mottakande lag kan 2-4 spelarar hospitere for kortare/lengre periodar i trening og kamp. Foreldra til dei aktuelle spelarane skal informerast og rådførast i forkant.

Sentrale mål for treninga:

- alle skal ha det gøy

- utvikle basisteknikkar: mottak - pasning - skot.

- lære grunnleggande pasningsspel

- utvikle evna til toleranse, respekt og disiplin. Spelarane skal no ta og få ansvar.

- motiver til eigentrening/balleik på fritida.

Når ein trenar er det viktig å trene ein teknikk/dugleik saman med ein annan.

Mottak - pasning

Mottak - skot

Føre - finte - skot

Kjenneteikn ved aldersgruppa:

- store skilnader i fysisk og mental utvikling

- kraftig vekstperiode

- motorikk og koordinasjonsevne i fin utvikling

- konsentrasjonsevna i god utvikling

- kreativiteten i kraftig utvikling

- spelarane er ærgjerrige og lærenemme

- haldningar vert lett skapte

- spelarane er prestasjonsmedvitne

- stor variasjon i prestasjonsevna til den enkelte

- sterkare sosiale behov

- pubertet

Trenings og kamptilbod:

- 3 - 4 treningar pr. veke

- kamptilbod 11-fotball og 7 fotball, skal vere kamptilbod til alle

Ein skal her gå bort frå reine årsklasser, og heller tenkje smågut/jente, gut/jente. Det medfører at ein får ei stor og ueinsarta gruppa innanfor kvart nivå og gjerne må dele i ei treningsgruppe 1 og 2. Dei som er komne lengst trenar og spelar kampar saman og det same gjeld for dei nest beste. Dette vil vere eit naudsynt steg å ta, og vil vere til det beste for alle. Alle vert no sikra eit trenings og kamptilbod som er tilpassa det nivået dei er på, og i høve kor mykje dei vil satse på fotball.

Vidare:

- Utviklingsgrupper etter same prinsipp som nemnt tidlegare.( sjå og eige punkt)

- Trenarar i samband med trenarkoordinator har ansvar for å melde på spelarar til sonesamling ut frå dugleik, haldning og innsats.

- Hospitering - Spelarar med gode føresetnader og haldningar får tilbod om trenings- og kamptilbod på eit nivå over det alderstrinnet dei vanlegvis spelar på. Trenarane for laga tek avgjerda saman med trenarkoordinator og føresette for dei det gjeld.

- Permanent oppflytting kan i enkeltståande høve verte aktuelt, klubbens sportslege organ tek avgjerda i slike saker.

- Gje fotballtilbod gjennom heile året

- Dei aktive må etter kvart velje hovudidrett.

*treningsmengda i desse årsklassene skal som sagt ligge på 3-4 fellestreningar i veka, og ein må framleis tilstrebe å legge til rette for eigentrening.

* laga må ha kvalifiserte trenarar som gjer spelarane utfordringar ut frå eigne ferdigheiter.

Sentrale mål for treninga

- Innanfor desse årsklassene må ein starte ein bevisstgjeringsprosess hos spelarane i høve kva som krevst for at ein skal bli god.

- utvikle spelarar som skal verte framtidige a-spelarar

- krav til eigentrening for dei som vil verte toppspelarar

- alle skal få eit seriøst tilbod om trening og kamp

- utvikle kreativiteten, oppfordre til sjølvstendige val

- utvikle taktisk forståing og teknisk ferdigheit

Taktisk teknisk påverknad

-teknisk dugleiksstrening framleis sentralt

Mottak

Pasning

Skot

Heading

Vending

Takling

Finter

1 mot 1

2 mot 1

I tillegg til dei individuelle ferdigheitene må ein tenke meir relasjonar og struktur.

Mange og store utfordringar ligg her.

- skap ei trygt miljø

- jobb med haldningar til trening og kamp

- ferdigheitsutvikling individuelt og relasjonelt

- ha ein klar plan og utviklingsmål som ein jobbar mot

- gradvis auking i treningsbelastninga, men tren uthald med ball og ved hjelp av speløvingar.

Det som heile tida må stå i sentrum er at kravet til kvalitet i det ein føretek seg vert sterkare. Som trenar må ein legge norma for kva som er kvalitet i høve det ein trenar på. Vis det gode øvingsbildet.

Det som er beskrive over er framleis sentralt og viktig. Men, ein må samtidig sette litt sterkare krav til prestasjonsforbetring for dei spelarane som snart skal inn i vaksenfotballen.

Mål for opplæringa.

- utvikle spelarar til A-laget

- utvikle taktisk forståing, teknisk dugleik og kreativitet

- utvikle heile mennesket der fotballen vert sett inn i rett samanhang

- sjå til at alle får eit trenings og kamptilbod

- skape eit treningsmiljø der ein forstår kva som skal til for å verte ein god spelar og seinare ein toppspelar.

- haldningar til trening, skule, levesett og det å ta ansvar

Trenings og kamptilbod:

- ein må organisere treningane slik at dei som er best/kan nå lengst får høve til å verte betre. Treningsgrupper er ei god løysing, differensiering i kamptilbod naudsynt.

- 4 til 5 treningar i veka

- dei beste hospiterer med a-lag

- dei beste i eigen talentgruppetrening

- trening året rundt

- pass på å halde spelarane i flytsona, dvs gje varierte utfordringar i høve nivå.

Utviklingsgrupper:

Innanfor 12-16 år og 16-19 år skal det vere tilbod om spelarutvikling i gruppe som ein forlenging av sesongen.

Gruppene kan bestå av 15 til ca 20 spelarar og møtest til trening ein gong i veka i tida frå sesongslutt og fram til nyttår. Etter nyttår skal det arrangerast samling ein gong pr. mnd. Sportsleg leiing, trenarkoordinator og trenarar vel ut spelarar ut frå gjevne kriterium.

Fotballdugleik og utvikling av den vert i fokus på fellestreningane, og den enkelte spelar har sjølv ansvar for eigentrening.

Denne planen skal leggjast fram for styret for mellombels godkjenning, og skal rullerast årleg.

Styret og trenarforum arbeider vidare med utgangspunkt i denne planen, går i detaljar og har eit ferdig plandokument klar til godkjenning på årsmøtet i VTI fotball 2006.

For å drive den aktiviteten ein pr. dato har i VTI-fotball krevst det store økonomiske ressursar. Den daglege drifta krev sitt, men det er også stor trong for vidareutvikling av stadionanlegget. I planverket ligg det mange moment som kvar for seg kostar pengar, og sett over litt tid inneber dette svært store kostnader, både i reine pengar og dugnadsinnsats.

VTI-fotball har hausten 2005 ein rimeleg anstrengt økonomi. Klubben har levd på forskot og hatt for dårleg økonomistyring i periodar. Dette vert det styret si oppgåve å ta fatt i og til å hjelpe seg har dei ein stab med spisskompetanse på økonomi og styring av denne. I tillegg skal det hausten 2005 av styret setjast ned ei plangruppe som skal snu alle steinar og sjå etter potensielle inntektskjelder på kort og lang sikt.

Våren 2005 har styret arbeidd godt og kreativt med å skape nye inntektskjelder. Mellom anna kan billotteri og dansegalla nemnast. Dette er truleg tiltak som kan gjerast årlege og etter kvart som dei vert innarbeidde kan gje gode overskot. Likevel er ikkje dette nok med tanke på dei uløyste oppgåvene klubben har. Vonleg kan styret leggje fram ein rekneskap om lag i balanse ved årsslutt, men det vil koste pengar å drive laget også neste år i tillegg til at ein slit med eit større etterslep frå 2004 som må inndekkjast. Damelaget (i samarbeid med Ørsta) spelar då i 1. divisjon i tillegg til at B-laget på damesida spelar i 2. eller som juniorar. Skal herrelaget ta mål av seg til å vere med i opprykksstriden krev det også sitt. I tillegg aukar talet på lag i yngres avdeling og det kan verte fleire juniorlag på herresida der eitt spelar i Nordeaserien, noko som medfører meirkostnad. Sportsleg suksess er bra, men det fordrar god økonomi.

Plangruppa skal setje saman ein plan for korleis VTI-fotball skal greie å auke inntektene sine monaleg dei komande åra. Denne planen skal vere realistisk og talfesta både når det gjeld tid og pengar på kort og lang sikt. Eit konkret mål i fyrste omgang er minst å doble inntektssida i høve 2004 innan 2007. 2004 lærte oss at det kostar mykje pengar å rykkje opp, men det er vanskeleg å auke inntektssida. Utkast til planen skal presenterast for styret i mai 2006, endeleg plan skal vere styret i hende oktober 2006 og godkjennast av årsmøtet 2006. Planen skal ta omsyn til og ikkje vere i strid med hovudprinsippa i planverket elles. Eksisterande inntektsgrunnlag må ikkje takast frå dei grupperingane i laget som har det i dag.