Ny 5-1 siger. Denne gong mot Vartdal.

Det vart 5-1 til Volda i treningskampen mot Vartdal på stadion i kveld. Fortent nok, men utan å imponere. Brukbar førsteomgang vart avløyst av ein heller svak andre. Målscorarar for Volda var Frantz Frantzen 2, Rune Haugen, Atle Driveklepp og Bjørnar Bakke Liaskar (på straffe).

Med temperaturen omsider opp mot 0 grader vart underlaget litt glattare enn siste kamp. Det sette nok sitt preg på kampen, der både pasningsretning og mottak vart lidande. Slik sett var nok kampen eit steg tilbake i høve kampen mot Bergsøy. Likevel brukbar første omgang der Volda dominerte. Rune Haugen skapte då ein del på si side og fekk æra av å lage 1-0 på ei gjennomløping allereide etter 8 minutt. Atle Driveklepp sitt skot/frisparkinnlegg gjekk så rett gjennom alt og alle til 2-0, før Vartdal reduserte ved Rolf Audun Vartdal, etter at ein voldaforsvarar glei over ende. 3-1 kom på ei flott vending av Frantz Frantzen med påfølgande skot i hjørnet.

Same mann starta 2. omgang med å setje Christian Malmo sitt fine innlegg i mål, før kampen gjekk inn i ei slags dvale. Det meste gjekk føre seg på midtbana, med få sjansar begge vegar. Volda auka likevel til 5-1 like før slutt då Obako Andani vart sprunge overende, og Bjørnar Liaskar banka straffesparket knallhardt opp under tverrliggaren, midt i målet.

Brukbar første omgang, forholda tatt i betraktning, men etter kvila vart det alt for upresist. Skal ein plukke fram eit par pluss denne gongen vel vi Rune Haugen sin første omgang og Knut Arne Grimstad med god kontroll på sentral midtbane.
Kan også nemne at Sander Håskjold Nyland spelte siste timen for Vartdal, då keeperen deira vart lettare skadd. Det greidde han godt!

Birger Breivik dømde. Missa nok på eit par offsidar, men greidde seg elles greitt. Ikkje lett å dømme i tussmørke heller, med to så like drakter i spel. Hadde kanskje vore ein tanke med gule vestar til eine laget?

Laget: Nikolai Brune Engeset, Atle Driveklepp, Tobias Evebø, Rasmus Aarflot, Lars Johan Holsvik, Bjørnar Bakke Liaskar (Sondre Lutcke Lid , Hans Husøy (Sondre Fossheim), Knut Arne Grimstad, Christian Malmo, Frantz Frantzen, Rune Haugen (Obako Andani).

                                       (Foto: AG)

Knut Arne hadde god kontroll på midtbana.
To fine mål frå Frantz Frantzen (t.h.)
Sander Håskjold Nyland var gjestekeeper for Vartdal. Tobias Evebø til venstre.
Coaching!	Rune Haugen scora nok eit mål.